سرطان البروستات وأهمية الكشف المبكر

  • Dr. Wafaaبواسطة: Dr. Wafaa تاريخ النشر: الثلاثاء، 25 مايو 2021
سرطان البروستات وأهمية الكشف المبكر
مقالات ذات صلة
ما هي فوائد جوزة الطيب للرجال وماهي أضرارها
ما هي فوائد مغلي القرنفل للرجال
تكثيف اللحية بالعديد من الطرق والوصفات الطبيعية

دكتورة ليش بضل اسمعن يحكو عن شهر نوفمبر؟شو في بهالشهر؟

هيدا شهر الكشف المبكر عن #سرطان_البروستات

 آه لهيك بتنطلق الحملة العالمية #NO_SHAVE_NOVEMBER (لا حلاقة في شهر تشرين الثاني)

تماماً تضامناً مع مرضى السرطان ولتسليط الضو على الأمراض يلي بعانو منها الذكور فقط! 

طيب ليش كل هاد عم يصير؟ كل هالقد مهم؟

طبعاً… لأنو سرطان البروستات هو من أشيع أمراض السرطان يلي بتصيب الذكور وتاني سبب للوفيات عندن بعد سرطان الرئة.

ولأنو كمان إذا تم الكشف عنو مبكّراً بيرفع معدّل البقيا لنسبة عالية ممكن توصل ل 100%!

طيب شو لازم نعمل لنكشفو مبكراً دكتورة؟

 هون منعمل شي بيختلف عن يلي منعملو بالكشف عن سرطان الثدي… منعمل تحليل دم لنعاير فيه مستوى المستضد البروستاتي (PSA)

بالإضافة لهالشي أثناء فحص المريض منعمل مسّ شرجي لنفحص الغدة ونشوف كيف قواما واذا في مؤشر على وجود السرطان متل القساوة أو التصلّب

طيب وبأي عمر لازم نبلش نعمل هالتحليل؟

يفضل نحنا نبلش من عمر ال 50 سنة وفي حال وجود قصة عائلية للسرطان (مثلا الأب مصاب أو العم أو الأخ….) يفضل نبلش من عمر ال 40 سنة

 طيب وكيف منشخصو مافهمت؟

هلا نحنا عمنعمل تحليل الPSA كل فترة.. في حال كانت القيمة مو طبيعية منراجع الطبيب وهو بيقوم بفحص المريض وفي حال شكينا بالسرطان منعمل تصوير إيكو عبر الشرج.. وإذا وجهتني لخباثة وقتا بعمل (( خزعة بروستات)) يلي هي المعيار الذهبي بالتشخيص.

هلا دكتورة هو إلو أعراض؟ 

هو بغالب الأحيان بيكون صامت سريرياً، ومافي أي أعراض (ولهالشي نحنا لازم نعمل كشف مبكر) وفي حال وجود أعراض عند بعض المرضى ممكن نلاحظ تعدّد بيلات ليليّة مع آلام وحرقة أثناء التبوّل…وإذا كتير كتير أهملنا بيعمل انتقالات للعظم وبيسبب آلام شديدة فيها.

يعني في علاج ولا لا؟

 في حال نحنا قمنا بالكشف المبكر متل ماحكينا فوق فممكن توصل نسبة الشفاء ل 100%. العلاج بيكون حسب الحالة، ومنناقشا مع المريض.

فإذا كشفناه ببدايتو منقوم باستئصال غدة البروستات جراحياً مع تجريف العقد اللمفاوية المصابة وممكن ببعض الحالات نضيف العلاج الشعاعي، وفي حال وجود انتقالات للورم فينا نستخدم العلاج الكيماوي.

وكمان ماننسى:

  •  نتبع نظام غذائي صحي منخفض الدهون المشبعة وغني بالخضار والفواكه
  •  نمارس بالرياضة بشكل منتظم..
  • نبتعد عن التدخين 

لأنك أنتَ كتير مهم، لأنك أنتَ سند البيت، لأنك قوي كتير،  ولأنو الكل بحاجتك لأنك الحياة

لاتنسا تقوم بإجراء اختبار الPSA دورياً 

لأنك… أقوى من السرطان

  • المحتوى الذي تستمتع به هنا يمثل رأي المساهم وليس بالضرورة رأي الناشر. يحتفظ الناشر بالحق في عدم نشر المحتوى.

    Dr. Wafaa

    الكاتب Dr. Wafaa

    ◾طالبة في كلية الطب البشري جامعة دمشق السنة السادسة ◾عضو في الفريق الطبي التطوعي قسم التوعية الصحية ◾شاركت في ترجمة مرجع principles of general surgery ◾حاصلة على شهادة حضور مؤتمر AIMS MEETING 2021 في البرتغال ◾كاتبة للمقالات الطبية ◾رسامة

    Show More