دردشة مع الدكتورة سماح.. فرط التهوية أو Hyperventilation

  • تاريخ النشر: الأحد، 14 فبراير 2021
دردشة مع الدكتورة سماح.. فرط التهوية أو Hyperventilation
مقالات ذات صلة
التهاب دواعم السن
ضعف السمع
أمراض المهنة وإصابات العمل
  • يحصل أن تكوني أنثى حساسة قبل ما ينام حبيبك بعتلك " تصبحي على خير" هيك حاف.. دارت الأفكار براسك يميناً وشمالاً.. عصّبتي خفتي تخسريه غلي الدم براسك.. صرتي تتنفسي بسرعة.. وفجأة بتحسي خفّة براسك ما عم يثبت عليكِ وبتشعري بشعور غريب وكأنك انفصلتي عن العالم المحيط فيكِ.. ما عاد حسيتي بأيديكِ ورجليكِ قصفوا.. دختي وحاسة حالك شوي تانية رح توقعي وتفقدي الوعي! شو صار معك؟
  • رهاب السنغلة😂💔 لا لا.. يلي صار معك حالة منسميها طبياً #فرط_التهوية أو #Hyperventilation بحيث أنتِ ونتيجة تنفسك السريع والعميق صرتي عم تزفري أكتر مما عما تاخدي شهيق يعني عم ترمي CO2 زيادة عن الطبيعي.. فالكربون عم ينقص بدمك.. طيب أوكي مو منيح هيك في أوكسجين تمام وكربون قليل مو هيك الحالة الأكسجية منيحة! 😇
  • هوي أي الدماغ بحب الأوكسجين بس كمان متل كل الدنيا في عنا توازن بين الأوكسجين والكربون و #الزايد_أخو_الناقص بحيث نقص الكربون بالدم رح يعمل أمرين : يقبض أوعية الدم الرايحة للدماغ فتنقص الأكسجة عنو لهيك بصير في دوخة وخفة راس وممكن إغماء. رح يعمل زيادة قلوية بالدم يعني يلعب بالوسط الكيميائي وهالشي بسبب نقص كلس الدم فبصيب المريض مشاكل حس وتكزز.
  • هالحالة غالباً بتصيب الإناث بالأعمار الصغيرة وغالباً غالباً سببو نفسي نتيجة خوف أو شدة عاطفية نفسية! لكن ممكن يصير لأسباب تانية ممكن مرض رئوي قلبي.. نزف.. ربو وما إلى ذلك.
  • شاهدي أيضاً: دردشة مع الدكتورة سماح.. تصحيح مفاهيم وتوعية 🧡🧡

  • ولنحدد السبب بالضبط لازمنا قصة وفحص واستقصاءات بس الشائع متل ما قلنا السبب النفسي ومتل حالة الصبية يلي حكينا عنها كلشي منعملو أنو منطلب منها تهدي حالها بس تجيها النوبة تاني مرة وتحاول تجيب كيس وتتنفس من خلالو متل بالصورة لحتى نحبس الكربون بالكيس وتصير تستنشقو فيزيد بالدم وتروح الأعراض 👌 ممكن إذا في أسباب تانية مرضية عضوية نعالجها وممكن يكون المريض بحاجة علاج نفسي لكن بالمجمل تهدئة المريض وطمأنتو بتحل المشكلة كلا من أساسها 🙋‍♀️ يعني هوي شوية دلال وغناج و أوفر حساسية 😋🙆‍♀️ لهيك شبابنا الكرام بعتوا تصبحي عخير مع قلب 🧡 الله يرضى عليكم 😂
  • كنت معكم سَماح صالح محمد 🧡