;

دردشة مع الدكتورة سماح.. متلازمة الحب بلسان غدي ?

  • تاريخ النشر: الجمعة، 22 يناير 2021
دردشة مع الدكتورة سماح.. متلازمة الحب بلسان غدي ?

اسمي غَدي ? غَدي الملاك.

أنا مختَلِف عنكن، مميّز حتى وقت خلقت.. كلكن عندكن 46 صبغي إلا أنا بالصبغي 21 قرر الرّب يعطيني صبغي زايد ويحمّل كل خلية من خلايا جسمي 3 نسخ من هالصبغي بدل تنين لهيك أنتوا بتسمّوا حالتي #تثلث_الصبغي_21.

  • ولحتى الكل يعرفني ويقدر يميّزني من بين كتير من البشر الله عطاني شكل فريد من نوعو ?

وجه مفلطح متل الشمس.. عيون لوزية مايلة ( مو أنتوا إذا بدكن تتغزلوا بعيون حدا بتقولوا عيون لوزية) يعني متل عيوني.. رقبة قصيرة وراس صغير.. آدان صغيرة وأيدين ورجلين صغار لأنو دوماً الصغير بيقدر يمشي أسرع وأخفّ فكل تفاصيلي اخترتها صغيرة.. حتى قزحية عيوني مميزة فيها بقع بيضا متل عيون سامي #بأنا_وأخي ? عيون عم تلمع.. بحب طلع لساني لبرا وتمي بيبقى مفتوح لأنو تنفسي صعب من أنفي فبحاول ساعد حالي لأتنفس.

  • والملاك الو جوانح وأنا كمان بس شفافة الجوانح هي وما بتشوفوها غير وقت تتطلعوا بعيوني وتسمعوا قلبي ?

الله عطاني عفوية بالحياة وصدق ودفا.. أنا دوماً فرحان ودوماً صبور ودوماً لطيف.. ومرة تانية فرحان ?

بحب كل الناس وبستلطف كل الناس ولا عندي ذرة عدوانية بس بكره التغيير وأحياناً بعنّد وأحياناً كتيرة بكون صعب عليي انتبه أو أقدر أفهم بسرعة أو أحكي بسرعة ? يعني الملاك الو لغتو الخاصة وحياتو الخاصة.. صح؟

? الألم لأنو عندي مشاكل تفكيرية معرفية أو حد منخفض لمتوسط من الذكاء.

ممكن عاني من فقدان السمع ومشاكل التهابات أذن متكررة.

مشاكل عينية من حوَل أو مشاكل رؤية.

مشاكل قلبية خلقية.

تأخر نمو.

انقطاع نفس أثناء النوم.

مشاكل نفسية متل الوسواس القهري أو الاكتئاب.

? الأمَل بأني دوماً عندي ورغم كل هالألَم قدرة على #التطور_الاجتماعي وقدرة هائلة على المحبة.. دوماً بقدر أتحدى كل هالآلام وكل هالنقص بضحكة وفرح ?

  • سبب المتلازمة عندي مانو محدد بشكل واضح علمياً بس ممكن نقول أنو إذا كانت الماما عمرها أكتر من 35 فبكون عندها احتمالية أكبر ليجي البيبي بمتلازمة الحب مع أنو معظم مالكي هالمتلازمة اجوا من أمهات أصغر من هالعمر!
  • ممكن تنعرف الحالة قبل الولادة أي بفحوصات جينية أو إيكو أو فحوص مصلية خاصة ورغم أننا أصحاب هالمتلازمة متشابهين نوعاً ما بالشكل والسلوك بس لكل حدا فينا قدرات مختلفة.. كل حدا فينا ملاك مميّز ?
  • ما في علاج للمتلازمة إلا شي واحد!

أنو تتقبلّونا وتتقبلّوا اختلافنا وتتعلموا منّا كيف أنو المختلف طبيعي مانو مريض.. وإن كنت أنا مختلف عنكن بخلاياي وبشكلي وسلوكي وغيري مختلف عنكن بفكرة، بدين، بمعتقد، بسياسة، بجنس.. بس كلنا خلفاء الله عهالأرض.. كلنا عنا روح وقلب وعقل ومشاعر ? كلنا من نفس الطينة!

ومين عنا ما عندو نقص.. ومين عنا ما عندو اختلاف!

تعلموا مني تكونوا دوماً محبين، عفويين، صادقين..

صبورين، متحملين وخلّاقين..

تكونوا متلي ملائكة ?

كل الحب لكل من امتلك متلازمة الحب ?

مني أنا سَماح صالح محمد ?