دردشة مع الدكتورة سماح.. فقر الدم بعوز الحديد ⭕

  • تاريخ النشر: الأحد، 17 يناير 2021
دردشة مع الدكتورة سماح.. فقر الدم بعوز الحديد ⭕
مقالات ذات صلة
دردشة مع الدكتورة سماح.. لا تخلي هالحزن مكبوت جواتك.. ابكي بترتاح!
أعراض تكيس المبايض
الفرق بين ثدي العزباء والمتزوجة

ما بتعرف كيف ممكن تتغير حياتك بين لحظة ولحظة!😨

كنت حدا كتير نشيط وكتير شاطر ومتفوق بجامعتو ومليانة طاقة وتفاؤل وحيوية.. فجأة صارت تجيني أعراض بشعة ومؤذية وحتى غريبة!

تعبانة كل الوقت، وأنا عم استريح تعبانة.. بمسك المحاضرة لأدرس بحس دماغي مو معي 💔 #ولا_نتفة_تركيز!

لوني بحسو بضل رايح ومتل الختيارة يلي عمرها ٦٠ سنة بضلو أيديي ورجليي مبوظات 😩 حتى أضافري متل أضافر الختايرة ضعاف وهشين وشكلن غريب!

بضل راسي واجعني وبحس بوخزات برجليي.. ضيق نفس وتسرع قلب و #دوخة 💔 وأحياناً وبشكل غريب #بشتهي_أكول_تلج_أو_طين!

  • فكرت وقت أجتني دوخة أني مريضة بأداني فراجعت طبيب #أذنية وشخصلي التهاب أذن وسطى بس نصحني راجع #طبيب_دم ما بعرف ليش!
  • المهم رحنا لعند دكتور الدم واستجوبني وفحصني وطلب تحاليل دم عامة وحديد مصل وترانسفيرين و #سعة_رابطة_للحديد ولطاخ دم.. المهم أنو طلع معو أني مريضة #فقر_دم_بعوز_الحديد ولأني أنا فضولية زيادة عن اللزوم وكتيّرة غلبة 😂 استجوبتوا للدكتور وسحبت كل محاضرة هالمرض من لسانو 🙋‍♀️
  • قال طلع هالنوع أشيع نوع فقر دم بالعالم!

الو أسباب كتيرة حسب العمر فمثلاً عند البنات بسني أكتر سبب بكون هوي الدورة إن كانت غزيرة.

عند الحوامل بسبب نزوف الولادة بصير عندن نقص حديد أو بسبب نمو الجنين يلي بكون بحاجة حديد.

عند الأطفال بعد عمر ال٦ شهور إذا ما دخلتلن الأم أكل فيه حديد أو إذا كانت عم تشربهن حليب بقر قبل السنة!

بباقي الأعمار ممكن يكون بسبب ضياع الدم لسبب نزفي أو طفيليات بتعمل نزف.

ممكن بسبب #نقص_الوارد_الغذائي وهاد سبب كتير مهم.

ممكن بسبب أمراض سوء الامتصاص كمان.

  • لناخد حديد من الغذاء لازم ناكل لحم جاج أو بقر، بيض، خضار ورقية متل السبانخ، فاصوليا، يقطين، قرع، زبيب، سردين ويفضل يتاخدو هدول مع غذاء فيه فيتامين سي ليسهل امتصاص الحديد لهيك الواحد بياكل ملوخية مع ليمون 😋 يممي 😋

وأي ما نشرب شاي وإذا عم ناخد شي أدوية بتنقص امتصاص الحديد متل #مضادات_الحموضة!

  • قلنالوا للدكتور مين شركائنا بالمصيبة؟

فقلي معظم النساء بسن النشاط التناسلي والحوامل والمتبرعين بالدم بشكل متكرر ومريضات #الإندومتريوز كمان.

  • ضروري نعوض حديد للحوامل كرمال ما يجي الولاد خدّج أو ناقصي وزن نسبة للعمر 😳
  • بعد هاللت كلو دكتور شو بتعالجنا؟

قبل كلشي منحدد سبب عوز الحديد ومنعالجو بعدين لازم نلتزم نظام غذائي غني بالحديد ونبلش #معالجة_دوائية_فموية لمدة ٣ ل٦ أشهر.

إذا ما لاقينا نتيجة أو ما تحملنا الدوا أو كانت الحالة جداً إسعافية وشديدة منعوض بمعالجة وريدية بالمشفى حصراً تجنباً للصدمة التحسسية.

بعتذر منكن صرعت راسكن بقصتي بس حسيت الموضوع والله مهم وشائع #وجبت_التوعية 😔🧡

ملاحظة : أنا ككاتبة مقال ماني مريضة الحمدلله بس حبينا نحكي العلم بأسلوب القصة ليوصل أسهل 😃

كنت معكم سَماح صالح محمد 🥀