• منتديات بابونج

    منتديات بابونج، منتديات ثقافية متنوعة، تعرف على اصدقاء جدد وشاركهم معارفك وآرائك في بيئة نقاشية مفيدة

سؤال بسيط

يناقش هذا المنتدى أهم المواضيع المتعلقة بالإعلام والفن، وأخبار الفنانين والإعلاميين والقاضيا الإعلامية المطروحة على الساحة في مختلف البلدان العربية
صورة العضو الشخصية
الغافقى
إداري سابق
إداري سابق
مشاركات: 3657
اشترك في: الاثنين يونيو 02, 2008 6:38 pm

سؤال بسيط

مشاركةبواسطة الغافقى » الأربعاء إبريل 27, 2016 8:17 pm

سلام عليكم ورحمه الله

وحشتونى بجد ووحشتنى الزاويه جدا واللمه والاختلاف اللى كان بيننا

وبالرغم من انى كنت نويت اصمت عن كلام فى السياسه

إلا إن مصر بصراحه كل يوم بتثير فى النفس آلاما وشجون وافكار واحلام كتير

وسؤالى اللى بسأله

بكل بساطه كده

كم واحد كان يسمع عن جزيرتين فى مصر إسمهم تيران وصنافير

معقول كل اللى بيحصل ده والمظاهرات ودعوات تانيه لإسقاط النظام

كل ده علشان جزيرتين ...هى مصر خلاص إتلخصت وإختزلت فى الجزيرتين دول

أهميه إستراتيجيه وأهميه سياحيه وأهميه إقتصاديه و...و...و....

كل ده فى الجزيرتين دول وبقوا هما الامن القومى واصبحوا الشغل الشاغل لينا

لا اللى باع خاين ولا اللى بيطالب بيهم وطنى

ده لو كانوا اتباعوا .....الكلام كتير اصلا

سؤال تانى

لو كان حصل التنازل او البيع او ارجاع الحق لأصحابه ....زى ماتسميها سميها

لو كان حصل فى السر....كان فى حد هيسمع بيهم

يااااااااه فجأه كده المصريين حسوا إن ليهم ارض ووطن بيتمزق أوصاله وبيبكى عليه

ولا المصريين هيتأثروا أوى بإن جزيرتين كانوا بيخرجوا ليهم فى رحلات سفارى وإقامه معسكرات فجأه راحوا منهم

ده ناقص ناخد مقاول ونخرج نقيس المسافه بين مصر والسعوديه والجزيرتين ونشوف مين اقرب ياخدها

بلاش مزايدات فارغه من جهات إعلاميه ...ليهم كامل الأثر فى تجهيل شعب

وكفايه ياشعب تبقى عامل زى القطعان اللى بتتجمع على أى صفاره فارغه

نفسى نتجمع مره على شىء مهم ويستاهل

خلاص حلينا مشكله النيل وكله تمام وفاضل جزيرتين نقصوا من مساحه مصر

ماشفتش العزيمه دى والمظاهرات على مقدسات أخذها اليهود وشرف مسلمات إعتدى عليهن من أقذر البشر

بالذمه مش حاجه تضحك الناس علينا

كل ده وجمعه الارض واعتصام علشان ايه

ياجماعه روحوا شوفوا اقتصادكم اللى بينهار ...روحوا حاولوا تبنوا بلدكم بايدكم

بلاش سخافه وهيافه .....ارحمونا بقى




صورة العضو الشخصية
ÅĽЪ ĝҢáĺỵ
عضو مشارك
عضو مشارك
مشاركات: 864
اشترك في: الخميس سبتمبر 26, 2013 2:05 pm

Re: سؤال بسيط

مشاركةبواسطة ÅĽЪ ĝҢáĺỵ » الأحد مايو 01, 2016 5:58 am


الغافقي ازيك ومنور ويارب تكون بخير ويارب تكون فاكرني
لقيت اسمك منور كدا ف دخلت اشوف في ايه ويارتني مادخلت .. يارتني مادخلت XD

ماكنتش اتوقع منك انت كدا

خليني ابدأ من اخر مانهيت انت
اولا مشكلة سد النهضه زي ماسمتها مشكلة النيل دي مشكلة عواد اللي راح لهم وبارك بناء السد !!
وان كان علي الاقتصاد اللي بينهار ف دي مش مشكلتنا دي مشكلة نظام فاشل وفي الاخر هي مشكله داخليه مرتبطه بشوية حاجات كده هتتحل مسيرها هتتحل عاجلاً او آجلاً

انما الأرض هتروح بترسيم حدود جديد واعتراف مصري رسمي من النظام بمؤسساته بمجلس الشعب بإنها ارض سعوديه واتفاقيات وحاجات بتتوثق في الامم المتحده يعني مش هترجع تاني
الغضب مش علي الجزيرتين اللي عادي اننا منعرفهمش بالمناسبه !!

احنا لا كنا نعرف ام الرشراش ولا كنا نعرف شلاتين ولا الشيخ زويد وهي ارضنا .. نسيب السيس يفرط فيها يعني عشان منعرفهمش !؟

في نقطه كمان خفت علي حضرتك .. ان الناس مش نازله عشان الجزيرتين فقط ده الي ظاهر بس
انما الناس نزلت او اغلبها عشان حاجات كتير سبقت الجزيرتين مفيش وقت ولا مجال لذكرها وهي كانت فرصه للتنفيث عن الغضب وقدرنا نحسن استغلالها وسمًعت

وحاجه كمان تدعو للإندهاش في كلامك XD
لو كان حصل التنازل في السر كان حد هيسمع بيهم !!

يعني ايه حصل في السر هو جواز عرفي !؟
دي ارض تحت السياده المصريه عليها جنود مصريين ونقاط شرطه وتابعه لمحافظة جنوب سيناء

لما اتنقلت ملكيتها للسعوديه بالتالي اتلغت السياده المصريه وهيتم اجلاء الجنود المصريين من عليها وكل حاجه كانت بتثبت انها مصريه
وعشان يروحها اي مصري بعد كده هيكون عن طريق تأشيره !؟

هفترض معاك جدلاً انها ارض سعوديه ولو ان ده مش حقيقي .. بس هنفترض كده
هل بعد 60 سنه فجأه يتم اعادة الحق لأصحابه ويقرر السيس زي ماقال ياخد الضربه في صدره كده فجأه بدون سبب XD

لو النيه سليمه ولو الأرض دي فعلاً سعوديه كان ابسط حاجه وللمصداقيه كان طلب من السعوديه انه يتم التفاوض عن طريق لجنة تحكيم دولية تابعه للأمم المتحده
زي مابيحصل بين اي دولتين وزي ماحصل في طابا .. حتي لو مفيش نزاع بينا وبين السعوديه علي الارض وفي اتفاق واعتراف انها سعوديه

بس ببساطه كان السيس ببساطه عرض عليهم ان ده يتم عن طريق لجنه تحكيم دوليه عشان الشفافيه وعشان الشعب يطمئن ولو هي ارضكم اكيد هتاخدوها
ياريت تسأل نفسك ليه هو معملش كده !!

وياريت تكون قيمة الأرض اكبر من كده في نظرنا هي صح مش هتزودنا ولا هتنقصنا
هي سينا جابتلنا ايه من 50 سنه فاتوا غير الحرب والصداع واستنزاف موارد البلد كلها والاف الشهدا في اكتوبر ولحد دلوقتي بس ارضنا عرض وشرف ودم سال عليها

اسمحلي اقولك انت غير موفق في طرحك :(
ياريت متزعلش من كلامي وآسف علي الاطاله



العودة إلى “الزاوية الإعلامية والفنية”



الموجودون الآن

المستخدمون الذين يتصفحون المنتدى الآن: لا يوجد أعضاء مسجلين متصلين وزائر واحد

المتواجدون حاليا

المستخدمون الذين يتصفحون المنتدى الآن: لا يوجد أعضاء مسجلين متصلين وزائر واحد