أجمل أبيات الشعر العراقي باللهجة العامية العراقية

أبرز شعراء العامية العراقية وأجمل أبيات الشعر العراقي العامي
تاريخ النشر: 30/10/2017
آخر تحديث: 30/10/2017
شعر باللهجة العراقية

في هذه المادة؛ سنتعرف معاً على أبرز موضوعات القصيدة الشعبية العراقية، إضافة إلى أجمل أبيات الشِّعر العراقي باللَّهجة العراقيَّة المحكيَّة.

تعتبر اللَّهجة العراقيَّة من اللَّهجات المنتشرة في العالم العربي نتيجة انتشار الأغنية العراقيَّة وتميز الموسيقا العراقيَّة التي تمكنت من حمل الكلمة إلى المستمعين العرب من غير العراقيين بسلاسة وبساطة.

كما تميز الشعر العراقي بتعابيره الخاصة وقدرته على نقل الصور بإحساس عالٍ، لنتعرف معاً على أجمل الأبيات العراقية باللهجة العامية وأبرز شعراء العامية العراقية.

1

أجمل أبيات الشِّعر العراقي عن الحبِّ والغزل

يمثِّلُ الحبُّ والغزل وما يتفرع عنهما جزءاً رئيسياً من مواضيع الشِّعر العراقي الشَّعبي، وقد تناول شعراء العراق أحوال العشق من ألم وشوق ولوعة.

كما تناولوا جمالياته بلغة شعرية جذابة، ولتكن وقفتنا الأولى مع الشَّاعر العراقي مظفَّر النوَّاب المشهور بقصائده السياسية المكتوبة بالعربية الفصحى، لكنَّه يعتبر من مجددي القصيدة العراقية العامية أيضاً، ويلقب بشاعر القصيدتين.

قصيدة زرازير الليل للشَّاعر العراقي مظفَّر النوَّاب من ديوانه بالعامية "للريل وحمد":

حِنْ وأنا احنْ، وانحبس ونَّة ونمتِحنْ

مرخوص بس كُت الدَّمع، شرط الدَّمع حدَّ الجِفنْ

جفنك جِنح فراشَة غَضْ، وحجاره جفني وما غَمضْ

يا الـ تمشي بيا ويا النَبضْ

روحي عَلى روحك تنسِحِنْ

حِنْ بويه حِنْ حِنْ عَمي حِنْ

عيونَك زَرازِير البَرارِي، بكُل فَرحها بكُل نشاط جناحها بْعالي السَحَرْ

والرُوح مِني عوسَجة بَرْ

ما وصل ليها الندى ولا جَاسها بقطرِة مطرْ

وصفولي عنَك بالنباعِي تفيضْ

وتعنيت ليلة ويا القُمَرْ

وصفولي عنَك كُل مَسامَة تفيضْ مِنك عُطرْ

يا الحسنك نهرْ

تنزل بصدري ويا النفس وبدمي غَصبنْ تنعجنْ

وأشهق و أصعدلك للسما، بحسرات وبعنَّة حِزن

حِنْ... حِنْ بوي حِنْ

شفافك ولا قولَنْ وَرِدْ، عنابه معقودة عَقِدْ

تمتلي بقد ما تنمرد، لا هي دفو ولا هي بَرِدْ

أنا بوصفها راح اجنْ

سكتاتك تشكل خواطر بالقلب، مالي عرف بيهم قبلْ

مبروم برم الريزة يا ريان ومخوصر خصر لفَّ العَقلْ

كل كلمة منك نبعة الريحان بالدلال ... ما تحمل ثُقلْ

وصفولي عنك وردة القداح... ريش جناح

زاهي بالسحر

وصفولي عنك شال منك غيظ بستان الورد

والنرجس الرايج (ق) سِكِرْ

حني بفواريز ولحن ... وحنَّة حمامات السِّجنْ

واللي يعجبه خِلّ يحنْ!!

حِنْ بويه حِنْ

الفراق عند الشَّاعر العراقي حكمت ناهي

على اللي راح وخلَّاني ذليل القلب وأعاني

لا جاني خبر منه ولا طيفه هَلْ ثاني

على اللي راح بكتْ عيني واحس بالغربةْ تآذيني

ليالي فراقه قتالة وأنا انطر عسى يجيني

على اللي راح

على اللي راح ياخي شلون، وبعلومه أنا مفتون

رضيع يريد أمَّه شلون

سرب قوطر وخلاني... على اللي راح

على اللي راح وأنا فرحي معاه غرَّب

طير مأسور بعيونه يصلي يبتهل للرَّب

بصوته أنغام حزينةْ، من يواسي أنينه؟!

عسى تنجلي الغيمةْ وتزهي حواري المدينةْ

بشموع وحنَّةْ وزينةْ وطرب الأغاني القديمةْ

فينك يا نبي سليمان تسمع ترتيل الأماني

أنا بحلم ولا مس كابوس غشاني

على اللي راح

الحب والانتظار عند الشاعر العراقي جمعة الحلفي

مدري!

ناطْرتَك.. مثل ما تنطُّر الوردة نداها

وانت مو قطرة ندى وبس، انت نهر الروح، تسقي الروح وتخفف ظماها

ناطْرتَك.. مثل ما تنطُّر القاع المطر

روحي صبخه وانت غيمة شوق تتباهى بنسايمها وهواها

انت من يا كون جيت، يا مجرّة مضيع سنيني بسماها

انت عفت الناس كلها وتلوهتني، منين اجيب سنين لشواقك؟!

وأنا عمري تعداها وجزاها

انت جمرة شوق بيدي مدري اذبها! مدري اكوي سنيني بيها

مدري اخلي العمر يتباهى بضواها

يا نبي موديك قلي؟ تقطع صيامي وأنا الحالف قسم

ما بدِّل الجنَّة بسِواها

(ذ)ضوقتني، ضوقتني طعم البساتين من تفاحة آدم

وانت تفاح البساتين وغِواها

من طراوة طولك تطول الأيام، ومن حلاوة عشرتك يقصر مداها

انت من تهل طواري العيد هلَّت، يا فرحها ويا طربها ويا غناها

انت شجرة ياسمين، اش جاله شمام البراري يغار من نسمة هواها؟

انت، انت ايا مجنون دلاك على دربي؟ ايا نبي مسودن رسملك سكتي؟

يانهر جابك على العشبةْ وسقاها.

وك روحي صبارة حزن يبن الأوادم

وانت قطرة فرح، ش يساقي العمر لو عطشت سنينه لصباها؟

بس أقلك: انت مو قطرة فرح، انت كل الفرح

كل الحزن... كل الورد

كل نجوم عمري وكل سماها.

قصيدة عراقية للشاعر ذياب كراز " أبو سرحان" عن الأشواق

ذبلنْ وعود العِشق بشفافك وماتِنْ، وطيور حبنا ارحلنْ ويا طيفك وتاهِنْ

وكل المهاجر أجى، وقلبك بعد ما حَنْ

وشوق الحمام أبهيد وألوانه ترفه

يا الرمشه بسته فرح وعيونه تجليبه

يا الطوله نايل عشق والشعر مدري به

مقتول من صيد أمس من كثر تعذيبه!

قلت مرَّة أحبك للشَّاعر العراقي زهير الدجيلي، وهذه القصيدة غنَّاها المطرب العراقي ياس خضر:

قلت أحبك مرَّة وحدة، والعمر بس مرَّةْ وحدةْ

صرت أشوفك أحلى ما مرسوم بالدِّنيا وأرسمك

صرت أشوفك وين ما يطلع قَمر

صرت أقول للناس حبوا .. هواية حبوا

لا تخلون الربيع بلا أية وردةْ

حتَّى يبقى الوفا شمعةْ، حتَّى تبقى الدنيا مليانةْ مودَّةْ

قـلت أحبك مرَّةْ وحدةْ والعمر بس مرَّةْ وحدةْ

مو محبين ليريدون ليحب لازم يشوف الهجر مرَّةْ

مو محبين ليحسبون القلب مثل المواسم ألف مرَّةْ

شلون لو ماي الوفا لبيناتنا طاح وتبده

شلون لو راحت الدنيا مسافره بلا أية مودَّه

ما أظن يبقى غصن شابكله وردةْ

ولا يمر بينه الهوى ولا مرَّةْ وحدةْ

قلت أحبك مرَّةْ وحدةْ والعمر بس مرَّةْ وحدةْ

تدري مرات الغياب يصير شامت وأضل أحسب

وحتى ساعات العتاب وياك ما خلتني أعتب

مرَّة أشوفك فرح يكبر، ومرَّة أشوفك حلم أخضر

ولأجل عينك والعيون الصافية بلون المودَّه

ولأجل عينك والعيون التعرف تحب مرَّة وحدةْ

قلت أحبك مرَّةْ وحدةْ والعمر بس مرَّةْ وحدةْ

2

ارتبط الحزن دائماً بالقصيدة والأغنية العراقية

في علاقة غامضة ارتبط العراقيون مع الأحزان منذ أمد بعيد، فأصبح الصوت العراقي الشعبي هو الصوت الحزين، كما أنَّ المقام اللامي الذي يميز الموسيقا العراقية فيه من الحزن والشجن ما يجعله سمة إضافية.

فضلاً عن تفضيل الشعراء لهذا النمط من القصائد لنجد عندهم عشرات الأبيات التي تتحدث عن الحزن والألم.

أحزان الشاعر العراقي جابر الشكرجي

يمر بينا الحزن ضيف واندارِ يه، ونفرش له الجرح من جور الأيامِ

ومن هم الكره اعلينا نلوليهْ وبلك(ج)ن من نلولي براحته ينامِ

لوليت وبكيت وقمت أحاكيه أثاري الجرح يكبر لون ينلامِ

الجرح ما أدري بيه اش بيه ما بيه، الجرح خزَّن ويسعر بالكبد قامِ

أثاري الجرح جرح الوقت مآذيه وجرح الناس ويا صرخات الأيتامِ

أبيات عرقية حزينة للشاعر جمعة الحلفي

يا شمعة البيت مليت، مليت

ودِّيني لهلي يا طيف، وصلني لهلي يا طيف

قربني لهلي يا طيف

هلي يا هلي... يا ضيفي العزيز الـ ما وراه ضيف

يا نسمة عليلة بأول الصيف

يا ليلي الحزين اللي فارق الكيف

يا لحظة حياة بطارف السيف

هلي يا هلي.. هلُو يا البعيدين

يا ناسينّا و(چ)كنكم ولا ناسين

يا متانينّا ولا (چ)كنكم متانين

يا طعم العشق يا ريحة الطين

يا نفحة وطن محروق يا بيت

أنا مليت...مليت... مليت...

شعر عراقي حزين للشاعر خالد العامري

بهيده على بختك يا قمر مساهر وأريد أشكيلك

أنا غريب بدنيتي، مضيِّع وأدور بليلك

عن ربعة أهلي ودلَّة الدِّيوان ومواويلك

عن ضحكة البربين لعيون الدلو

عن رقصة الصَّفصاف والماي الحلو

عن صحبتي وخلاني وعيون النهر

بهيده على بختك يا قمر

يا غربتي؛ غربة عصافير الـ تودع عشوشها برفَّة جِنح

و يا دمعتي؛ دمعة القاع الـ تبكي موت هروشها بجية الملح

يا دار أهلنا الطاهرة مر العمر

عيون الـ يحب مساهرة وما مش خبر

بهيده على بختك يا قمر

وك يا قمرنا مروتك حنّي الشواطي بدمعتي

قلهم كبرت على الصَّبر وألوانّه صارت غنوتي

مشتاق أبوسن دجلة وأشرب مايها، وأعزف ترانيم المحبَّة بنايها

دجله الهوى والسوق والحب والسهر

بهيده على بختك يا قمر.

3

شعر عراقي عن الوطن

عانى العراقيون الأمرين نتيجة الحروب المتتالية في العقود الأخيرة، وكرَّس شعراء القصيدة العراقية هذا الألم من خلال مجموعة من القصائد الوطنية بلهجتهم العراقية المحكية، فمعظمنا يعرف أبيات الموال العراقي الشهير:

اللي مضيع ذهب بسوق الذهب يلقاه

واللي مفارق محب كلها سنة وينساه

بس اللي مضيع وطن وين الوطن يلقاه

الشَّاعر العراقي حكمت ناهي يبحث عن بصيص الأمل

خذ الجمل بما حمل واترك ليا بصيص أمل

ما عاد قلبي يحتمل غربة ومنافي وعلل

غريب الديار غريبٍ غريب أصرخ كلي ولا من مجيب

أين أنت مني وطني الحبيب، بعيد عن عيني في قلبي قريب

يا دولاب الدهر للحاكم اسأل، عجب هاي الشباب اليوم تنذل؟!

وأرى شيباً بالمحيا هلهل وهل، رب العرش هل أحظى بهم هل؟

بالدنيا ولا أبتهل المنيةْ؟

يا جرح الكرامة شلون تالي، أصيح كلي فلا عمي وخالي

يا ميزان القييم الـ غدا خالي، همَّشني الزمن مثل أوراق منسية

دموع الرجال يا سامعين الصوت صعبة، تفاجئني وصارتلي على سبة

احيرن وين انطي وجهي واستخبى، يا خي مو أني الصقر؛ أني الضحية!

خذ الجمل بما حمل واترك ليا بصيص أمل ما عاد قلبي يحتمل غربه ومنافي وعلل

الشَّاعر العراقي عباس جيجان وقصيدة عراقي آني

انطيني من وقتك ثواني، ما أقلك آني... وآني

شاعر من أهل العراق، عربي وأصلي عدناني

قريشي ومن نسل قحطان، لا تركي ولا مدغوش بأفغاني

لك الزمان بيوم ذر الناس، الزمان عليك ذرّاني

وأخذ يردف علي ضرباته باليافوخ، لحد ما حيل خَوَّاني

لكن بي طبع ما طيح، روح اسأل عليّ وشهودي عدواني

مو إنسان يحكي وياك... جرح يمشي على طوله وشمعة بصواني

ما عندي لجوء يكتف الإنسان، ولا مربوط بلساني

وك استاتس عندي من عمان، وسياسي كوفي اعنان سمّاني

عراقي آني... من زاخو لعد الفاو عنواني

دجلة أمي وأبوي اسمه الفرات، وليلي مرجاني

عمت عين الزمان شلون ذَبّاني

ولو حز بضميري الجوع بس ما غيَّر ألواني

إي خسى التاريخ إذا مو بأول حروفه يحط اسم العراق ويشطب الثاني

عراقي آني اللي بقلبي على لساني

آنا الـ ما صحت يوم أحاه، وعلى متوني تقطَّع صوت سجاني

وأظن ما قصريت أوياه أخويه الـ كان ينخاني

يِأَشِّر بيده من بعيد، (ق)جديم القوم يلكاني

عطش مره شلت نهر الفرات وجيت، وشفت دجلة على الجولان يتناني

عراقي آنا، والـ يبيعن سكاير على الرصيف اليوم نسواني

والـ ماتوا بحسرة علبة حليب أطفال، هذوله أطفال خُوّاني

ما آغَنّي بعد بلاد العرب أوطاني من الشام لبغدانِ

ومن نجد الى يمنٍ إلى مصر فتطوانِ

عراقي آني

ولو تعرفني كل الناس بس أعطيك برهاني

من داروا عليّ عرب آخر زمان وحتى جيراني

ما هزوا وحك عيناك شعره من شعرات وجداني

عراقي آني

الشَّاعر العراقي خضير هادي وسوار الذهب

سوار أنا من ذهب، معدني معدن ذهب

ياما اشتروني ورجعوني، ورجعوا عليا وما لقوني

سوار أنا من ذهب وأعرف قيمتي

لكن من هالناس يعرف قيمتي؟

امرية كبيرة اللي اشترتني، لفَّتني بقماش وخفتني

حسيت ساعتها اسجنتني

بصندوقها اللي مليان حاجات احفظتني

وبس الظلام ويانا يبات

ودعيت إن تحتاج مرَّة، صارت العشرة وياها مُرَّة

واحتاجت وجت طلعتني، صارلها مدة مفاركتني

وباعتني للناس الباعوني، ويا الأساور علكوني

ومر بي شاب وياه بنية، اختاروني هم أجمل هدية

هو اشتراني إلها هيَّ، وأنا اشكره وصَّاها بيا

سوار أنا من ذهب، معصم الشعر الذهب

ياما غفيت بين ايديها، ومن تحزن أنا أحزن عليها

ودعيت إن تبقى اليا

ويموت هو... بلكي يموت هو... وتبقى هيَّ

وشاء القدر أن يرحل الشاب وأبقى أني ذكرى من الأحباب

تغطيني ملهوفة بشعرها وتضمني يا ناس لصدرها

ساعة تلفني بين الضلوع... وساعات تمسح بيا الدموع

ادموعها نار .. نار احرقني، نزلن على خدودي وكوني

ولليوم ما فرطت بيه وأني أظل أهواها هيَّ

ومن احتاج في يوم البلد، اتبرعت بيا للبلد

رد الذهب للذهب، سوار أنا من ذهب.

ختاماً... ما قدمناه لكم هو غيض من فيض اللهجة العراقية، ويمكن أن نتذكر الكثير من القصائد الأخرى من خلال مراجعة الأغاني العراقية الأصيلة من أغاني ناظم الغزالي، (حيَّاك بابا حيَّاك، قلي يا حلو من وين الله جابك...).

إلى أغاني سعدون جابر (قلي وش جابك عليّ، يوم اللي ما أشوفك...)، وليس انتهاءً بأغاني كاظم الساهر باللهجة العراقية.

التعليـــقات
جميع التعليقات تعبر عن وجهة نظر اصحابها وليس عن وجهة نظر